曼联喺「双红会」作客惨吞利物浦7蛋，追平球会史上最大败仗纪录，虽然胜败乃兵家常事，但一众球员比赛中放弃态度就令领队坦哈格愤怒。据英国传媒报道，铁腕治军嘅坦哈格赛後大发脾气，除勒令全队第二日晨早加操，更用「羞辱式」处分嚟要球员面对呢场世纪败仗，而般奴费南迪斯更被传将失去队长资格。

坦哈格喺「双红会」赛後，以「业余」、「不能接受」嚟形容球队表现，季初曼联吞宾福特4蛋後，坦哈格罚全队跑13.8公里作为惩罚，呢位荷兰教头今次就改变处罚方式，喺精神上要球员面对呢场耻辱赛事。消息人士向《太阳报》透露，坦哈格喺赛後嘅表现系「史上最愤怒」嘅一次。

报道指坦哈格赛後要球员留喺更衣室内，听利物浦球员以及晏菲路球迷疯狂庆祝嘅声音，并罚球员喺第二日朝早9点加操，当然坦哈格亦身先士卒，朝早7点已经去到训练场等待球员，并且预备埋「双红会」入面出丑嘅比赛片段，要球员面对自己嘅丑陋表现。

喺今场受到猛烈批评嘅队长般奴费南迪斯，面临付出沉重代价，英国《每日邮报》报道，曼联本来对呢位葡萄牙国脚接任队长已有怀疑，经过今场後进一步确定佢唔系合适人选，般费今场除提早放弃作战外，又卷入插水、推旁证等风波，完场後更拒绝向作客球迷致谢直返更衣室，态度引嚟球迷不满。

曼联队长哈利马古尼今个夏天好大机会离队，新队长人选预计会系迪基亚、卡斯米路同华拉尼之争，不过消息指坦哈格唔会喺今季内褫夺般费副队长职务，因为依家转队长会引起不必要嘅风波影响士气，但般费下季正式接任队长机会就变得渺茫。