拿玻里今季喺意甲同欧联大放异彩，进攻孖宝域陀奥森汉同基华拉斯基利亚出尽风头，不过南韩中坚金玟哉同样非常重要，佢今季代替高列巴尼成为防线核心，日前获教练史巴列堤大赞系「当今第1中坚」，难怪有传曼联已经加快斟介行动。

26岁嘅金玟哉今季登陆意甲，25场联赛同7场欧联全部正选上阵，防守稳健之余就连用波都出色，教练史巴列堤表示：「金玟哉每一场比赛大约会做20件神奇事情，喺我眼中，佢就系世界最佳中坚，当佢带住个波，5秒钟就可以杀到去对方禁区。」

金玟哉嘅合约当中，喺夏天会有为期15日嘅买断条款，买断价「只系」5,000万欧元，着名记者Romano表示曼联自上年11月开始蕴酿斟介，月初对拉素一仗更加派出球探去现场观战。据报拿玻里已向金玟哉开出新约，希望尽快移除呢条买断条款。