阿仙奴作客晏菲路球场被利物浦逼和2比2，表面上睇系失咗争标宝贵2分，但其实利物浦今场攻势凌厉，若非门将兰斯达尔连环神救，「兵工厂」连1分都几乎保唔住。阿仙奴依家领先曼城6分但踢多1场，好可能要同曼城斗到最後一刻，今场呢1分随时成为冠军关键。

利物浦今场有19次喺阿仙奴禁区内攻门，预期入球(xG)高达3.09球，足证「红军」攻势相当入肉，不过兰斯达尔就有神奇演出，下半场先救出达云纽尼斯嘅单刀，95分钟再飞身用手指尖托出穆罕默德沙拿妙射，到96分钟更匪夷所思咁扑出伊巴希马干拿迪门前2码头槌，获选为今场最佳球员系实至名归。

阿仙奴领队阿迪达赛後表示：「争标球队需要门将嘅神奇时刻，兰斯达尔帮我哋做到，就好似艾利臣比加多年来为利物浦所做嘅贡献。」《天空体育》主播加利尼维利亦表示：「兰斯达尔今场嘅扑救，有可能成为阿仙奴捧盃嘅决定性时刻！」