车路士继日前搵番林柏特回巢担任看守领队之後，又想再玩翻兜，英国各大传媒指会方计划邀请另一位前主帅安察洛堤下季执掌帅印，希望重演「肥安」13年前率领车仔捧英超冠军好戏。

车路士近期四出物色新帅，盛传人选包括拿高斯文、安历基、施丹等名帅，但从今次搵林柏特做「替工」，可见会方倾向聘请熟悉车路士及英超环境嘅领队。

安察洛堤教波生涯夺冠无数，能力比拿高斯文、安历基、施丹有过之而无不及，包括曾於2009至11年执教车路士，其中2009/10年球季夺得英超及英足盃双料冠军。

此外「肥安」2019至21年执教爱华顿期间，亦赢尽口碑，如果重返英超，唔需要时间适应环境，啱晒急於求成嘅车路士。

由於安察洛堤好可能今夏离开皇马，车仔呢个时候出手招揽佢，成事机会自然大增，适逢车路士同皇马将於欧联8强交锋，车仔正好可以趁机派人接触「肥安」，不过巴西国家队亦想聘请安察洛堤领军，依家就睇佢点选择。