热刺近年多次换帅，先後有普捷天奴、摩连奴、干地等名牌教头执教，但都打破唔到「无冠宿命」。据英国《太阳报》报道，热刺主席利维打算效法死敌阿仙奴，改用新冒起嘅年轻领队，目标直指啱啱率领般尼升班嘅高柏尼。

热刺依家由史泰连尼出任看守领队，有传佢哋想搵安历基、拿高斯文、罗渣士等名牌接手，不过《太阳报》指利维见阿仙奴今季由阿迪达带领成绩突出，认为年轻领队可以为球队注入活力，同阿迪达一样属「哥迪奥拿徒弟」嘅高柏尼，就成为首选目标。

报道指高柏尼对转教大球会持开放态度，尤其佢担心般尼唔可以提供足够资源，令般尼立足英超有难度，所以会愿意聆听热刺开出嘅条件。相比起阿迪达由曼城助教直接跳去阿仙奴担大旗，高柏尼已有执教安德列治同般尼3年经验，风险唔算太大。