AC米兰近年成绩突出，25岁中场伊斯美宾拿沙已成为球队中流砥柱，据报呢位喺阿仙奴青训出身嘅球星，今个夏天有望重返英超，而阿仙奴正正就系最积极搵佢回巢嘅球队，有望上演「爱回家」好戏。

曾经喺阿仙奴青训效力2年嘅伊斯美宾拿沙，喺AC米兰效力4季，一直系球队中场核心人物，欧联8强首回合对拿玻里更加一箭定江山。虽然伊斯美宾拿沙年初先同AC米兰续约，但据英国传媒报道，阿仙奴同利物浦仍然视佢为收购目标，准备夏天出手。

英国《太阳报》报道，阿仙奴一直有跟进伊斯美宾拿沙嘅发展，而且非常欣赏，1月收购佐真奴前，就曾经提出收购呢位阿尔及利亚国脚，可惜未能成事。为咗达成交易，据报阿仙奴打算用今季外借法甲嘅巴洛根作为交换筹码，巴洛根早前被阿仙奴定价4,000万欧元（约3.45亿港元），可见「兵工厂」出手唔低。