车路士喺欧联8强大战皇家马德里，巴西中坚堤亚高施华喺次回合前出口术，公开呼吁皇马教练安察洛堤做巴西国家队领队。堤亚高施华同安察洛堤曾经喺AC米兰同巴黎圣日耳门合作过，话唔定将来真系可以喺国家队重逢。

巴西喺世盃後同领队迪迪「分手」，依家仍然未有正式新帅，安察洛堤就系巴西足总头号目标，堤亚高施华日前表示：「老实讲，我好希望巴西新领队系安察洛堤，因为我同佢嘅友谊兼默契，佢系我喺欧洲球坛第1个教练(AC米兰)。安察洛堤嘅履历已说明一切，我唔知自己仲会唔会系国家队一员，但我希望佢会系巴西新领队。」

皇马今季西甲成绩下滑，联赛衞冕机会渺芒，如果球队喺欧联未能缔造佳绩，皇马好大机会喺今个夏天换帅。安察洛堤今个月初证实收到巴西足总斟介，形容系一个「令人兴奋」嘅邀请，但佢强调会尊重同皇马嘅合约。