曼联喺英超作客2比0赢诺定咸森林，喺两名正选中坚华拉尼同利辛度马天尼斯受伤下，队长哈利马古尼正选上阵力保不失，不过呢位英格兰中坚其实相当够运，佢喺上半场禁区内明显手球，全靠VAR「放生」先冇出事，但森林领队史提夫谷巴就嬲爆，要求首席裁判官韦比道歉。

哈利马古尼今场开波3分钟已经拎黄牌，踢到20分钟仲系0比0嗰阵，佢喺防守角球时高举左手至头部，结果个波就打中佢只手，但VAR检查後认为马古尼只手处於「自然位置」，所以唔作出追究。曼联名宿坚尼表示：「如果球证判12码，曼联都冇乜好投诉，马古尼今次行运。」

不过森林领队谷巴就「谷爆」，赛後猛烈批评球证执法：「呢个系好差劲嘅错判，佢(英国职业裁判员公司首席裁判官韦比)上星期为错判道歉，听日又要再一次道歉，但系道歉已经冇意义，错判出现太多次。我唔会话呢个判决系输波唯一原因，但呢球绝对系12码，马古尼亦可以拎第2面黄牌出场，呢个决定会改变成场比赛。」