周日(23日)西甲赛事，巴塞隆拿主场1比0击败马德里体育会，喺榜首继续以11分领先次席皇家马德里。巴塞隆拿今季踢咗30场联赛只失9球，成为欧洲5大联赛史上，首支喺头30场联赛保持单位数失球球队。

巴塞同马体会今仗互有攻守，马体会1分钟就有基沙文射门中楣底弹出，巴塞就喺44分钟就由费伦托利斯入波领先。换边後巴塞有扩大纪录机会，可以罗拔利云度夫斯基多次错失良机，幸好防线都顶得住，协助巴塞保持1比0胜果至完场。

巴塞今季30场联赛有23场保持不失，今场亦系第10次赢1比0，教练沙维赛後表示：「对我嚟讲，1比0系个好好嘅赛果，我唔介意场场都赢1比0。踢30场联赛只失9球并唔常见，证明我哋防守做得好好。」马体会教练施蒙尼赛後提前祝贺巴塞捧盃，沙维就话：「多谢施蒙尼，不过我哋仲未赢到任何嘢，拎冠军仲要赢多好多场波。」