曼城落实英超3连霸後，周日(21日)晚主场对车路士变成捧盃派对，完场後即举行颁奖仪式。今季英超攻入36球嘅艾宁夏兰特，自然成为派对入面嘅主角，当佢举起冠军奖盃嗰阵，即被队友「围攻」拎住香槟狂喷，艾宁夏兰特亦表示：「喺曼城第1季开始得唔算差！」

曼城1比0赢车路士後，大批主场球迷即冲入场内狂欢，吓到曼城球员都要返入更衣室，之後先再出番嚟进行冠军颁奖典礼，颁奖完毕後全队继续留喺场上开P，球员亦逐一同冠军奖盃合照，当艾宁夏兰特影相嗰阵，一班队友即用香槟帮佢「洗头」，基尔获加更追住佢狂喷。

当基亚利殊接受电视台访问，心情High爆嘅艾宁夏兰特亦「乱入」爆粗，对住直播镜头话：「你知道我好X爱你！」之後到佢接受《天空体育》访开，艾宁夏兰特表示：「呢啲系我会记一世嘅回忆，老实讲我冇准备到要讲乜，只系想享受呢一日。第1季有36个联赛入球、英超冠军，仲有2场决赛，开始得唔算差！」