曼联喺英足盃决赛1比2不敌曼城，2位红魔鬼名宿一齐发炮指曼联今场抵输，并不约而同批评门将迪基亚表现差劣，坚尼更加呼吁曼联下季必须更换正选门将。

曼联今仗所失2球，迪基亚被指反应较慢，特别系第2球失波，曼城中场根度简嘅射门并非太刁钻，但呢位西班牙国脚一样救唔到。坚尼唔客气话：「曼联需要世界级前锋及1位新门将，如果球队今场有1位顶级门将把关，赛果将会唔同，佢(迪基亚)一定唔系顶级门将。」

至於昔日曼联钢门舒米高指红魔鬼後备质素差，导致难以变阵扭转劣势：「大家可以睇到坦咯格手上嘅後备选择并唔多，今场充分凸显两队阵容分野，同埋曼城球员争胜战意较强，开波13秒，曼联失波，明显未做好准备，第2球失波，我认为迪基亚应该救到。」同时有唔少球迷批评迪基亚发挥差。

迪基亚将於今夏约满，经过今场英足盃低迷表现之後，未知会唔会影响曼联同倾佢续约。