西甲劲旅皇家马德里周日(4日)宣布，同队长宾施马达成协议，提早1年解约，早前有指沙特球队想招揽呢位老将，佢随时同旧拍档C朗喺沙特重逢。现年35岁嘅宾施马，於2009年从里昂加盟皇马，共上阵647次入353球，协助「银河舰队」夺冠无数，包括5度欧联封王，佢上年更首次荣膺金球奖，贡献良多，皇马亦唔阻佢掘金，昔日宾施马、C朗同加里夫巴利组成令人闻风丧胆嘅BBC锋线，而佢系BBC中最後一个离队，代表一个时代嘅终结。

皇马官方声明表示，宾施马喺「银河舰队」生涯一直用能力及保持职业态度，成为球队榜样，佢代表住皇马嘅价值观，赢得自己决定未来嘅权利，皇马永远系佢嘅家，祝愿佢同佢家人喺生活新一页一切顺利。

除此之外，皇马同时亦与夏萨特达成提前解约协议，呢位比利时国脚会喺今个月底回复自由身。据《The Athletic》消息，32岁嘅夏萨特有感自己状态同伤患问题严重，正慎重考虑结束足球生涯。

皇马同夏萨特嘅合约原本去到2024年夏天，但球会官方声明表示：「皇马同夏萨特达成解约协议，佢会喺6月30号回复自由身，夏萨特喺皇马4个球季赢到8个冠军，我哋好多谢佢嘅贡献，祝福夏萨特一家人有美好嘅发展。」

夏萨特喺2019年由车路士加盟皇马，转会费接近1亿欧元(约8.4亿港元)，可惜加盟後明显适应唔到，而且因伤缺席78场联赛，今季更加沦为大後备。《The Athletic》消息指，夏萨特收到美职同沙特等球会斟介，但佢觉得自己已经赢过晒可以赢嘅冠军，加上状态同伤患问题，好可能会选择提早收山。