曼联喺英足盃决赛被曼城技术性击倒，今季「埋单」只系拎到1个英联盃冠军，首季执教嘅领队坦哈格赛後承认，曼城系「世界第一球队」，但曼联仍然可以同对方杀到难分难解，足证球队表现出色。坦哈格表示已制定组军计划，目标之一嘅祖利安添巴亦有入场睇英足盃决赛！

坦哈格赛後表示：「首先要恭喜曼城捧盃，呢场波好紧凑，我哋大大限制呢支世界最佳球队嘅威胁力，所以我好满意球队今场表现。」呢位荷兰教头展望下季：「我已经将我嘅计划讲咗畀球会知，唯一一个目标就系不断改善球队。」

今场英足盃决赛有唔少明星入场，其中包括阿积士嘅荷兰中坚祖利安添巴，盛传呢位荷兰新星系坦哈格收购目标，去年曼联就曾经挖角失败，呢位21岁新星今次现身温布莱球场，就令唔少曼联迷相信球会正秘密操作呢次转会。