曼城喺英足盃2比1击败曼联捧盃，包办2球嘅根度简成为大英雄，不过呢位德国国脚嘅合约即将完结，盛传佢正考虑另觅挑战。曼城领队哥迪奥拿赛後大打「友情牌」，再次公开挽留根度简，但呢位中场未有回应，强调未作任何决定。

哥迪奥拿赛後表示：「根度简知道我点谂，球会已经做紧嘢，希望可以成功。我同根度简系邻居，住埋一齐好多年，所以我哋系非常好嘅朋友，佢踢得非常出色，希望最後会有一个好嘅结局。」西班牙传媒指巴塞隆拿好大机会签入根度简，甚至向佢开出3年+1年长约，令根度简心动。

32岁嘅根度简赛後谈及去向，佢一贯冷静咁回应：「老实讲，我唔需要呢啲日子嚟肯定曼城有几特别，否则我唔会喺呢度效力7季，依家我未决定任何嘢，即管睇下之情会点发展。」