车路士宣布今夏第一签，收购年仅16岁嘅厄瓜多尔中场新星柏斯，据悉转会费为1,750万镑(约1.7亿港元)，不过柏斯要等到18岁先至可以正式上「车」，为球队披甲，意味未来2年，车路士得物无所用，只能当作「期货投资」。

柏斯现时效力厄瓜多尔劲旅迪华利独立队，今年2月首次上阵，当时未满16岁，被誉为「未来金球奖得主」，迅速吸引多蒙特、曼联、车路士等大球会注意。柏斯有份为厄瓜多尔U20出战今届世青盃，并喺对斐济U20，射入1球，协助球队大胜9比0，自己亦成为世青盃史上最年轻入波球员，可见潜力非常优厚，所以车路士愿意出高价，收购呢位未来之星。

不过，由於年龄问题，预料柏斯未来2年仍然会留喺迪华利独立队，等到18岁先至登陆英超。

车路士最近1年大肆增兵，除咗收购成名球星之外，亦签入年轻小将，包括19岁巴西中场安迪利山度士，但因为佢未能获工作证，被外借番畀华斯高。安迪利山度士都有份为巴西U20出战今届世青盃，但巴西已於8强出局。