等到颈都长，利物浦於周四（8日）晚正式宣布，签入白礼顿阿历斯麦亚里士打，双方签约至2028年，将会穿10号波衫。虽然官方未有透露其他细节，但转会专家Fabrizio Romano喺佢哋官宣前爆料，指呢位阿根廷国脚嘅转会费只系3500万镑（约3.4亿港元），比传闻中4500至5500万镑为低，对於急需加强中场嘅红军嚟讲，用呢个价买到世盃冠军中场主力，真系笋到晕。

麦亚里士打对加盟利物浦感到不可思议，绝对系梦想成真，佢续指上年赢得世盃後，希望再赢更多冠军，认为利物浦可以帮佢实现呢个目标，因为红军系一间伟大嘅球会，并强调好开心，好期待为呢支豪门效力。

不过人红就是非多，呢位24岁球星嘅前女友爆料，指麦亚里士打喺赢世盃後，背叛女友搭上佢嘅闺蜜，系正宗渣男。阿历斯麦亚里士打上年底赢世盃冠军，当时女友Camila Mayan都有入场一齐庆祝，但两人喺世盃决赛後1星期就分手。早前拿达路马天尼斯结婚，麦亚里士打就被影到拖住Camila Mayan嘅闺蜜Ailen Cova现身，意味两人已经行埋。

本身都系网红嘅Camila Mayan日前喺电视台怒轰麦亚里士打：「佢哋背叛咗我，依家所发生嘅事，系我最坏最坏嘅噩梦，我完全冇谂过我最好嘅朋友(Ailen Cova)会咁样对我。」