今季喺艾美利执教下突飞猛进嘅阿士东维拉，拎到来季欧协联资格後雄心勃勃，周日(11日)宣布获比利时国脚泰利文斯自由身加盟，传闻维拉仲打算签埋阿历士张伯伦，以及挖角西维尔总监蒙奇，有意发大嚟搞！

现年26岁嘅泰利文斯同李斯特城合约届满，盛传利物浦、阿仙奴等豪门都对佢好有兴趣，不过阿士东维拉就抢先一步，宣布泰利文斯会喺7月1日以自由身加盟，双方签约4年。泰利文斯亦喺社交网向李斯特城告别：「我要同呢间神奇球会讲再见，永远唔会忘记大家嘅支持。」

据英国《TalkSPORT》报道，维拉下一步系瞄准同利物浦约满嘅阿历士张伯伦，而热刺中场卢施素、阿仙奴左闸基兰泰亚尼都系佢哋收购目标，消息指艾美利仲想搵埋以往西维尔合作嘅总监蒙奇加盟，野心极大。