曼联收购新门将行动正式展开，据意大利《天空体育》消息，「红魔鬼」正同国际米兰就收购奥拿拿进行接触，呢位喀麦隆国脚嘅经理人亦现身曼彻斯特谈判。消息指曼联领队坦哈格已锁定奥拿拿，认为呢位昔日阿积士3季冠军爱将，系曼联门将嘅「完美」人选，预计最终转会费将超过5,000万欧元(约4.29亿港元)。

曼联正选门将迪基亚合约即将完结，续约一事亦未有进展，曼联喺夏天收购门将系重要任务。意大利《天空体育》透露，国际米兰门将奥拿拿嘅经理人保迪尼斯，周四(22日)已飞抵曼彻斯特同曼联高层谈判，国米方面亦愿意放人，但要求至少5,000万欧元外加浮动奖金条款；据报国米同时已物色替补人选，被曼联视为积极讯号。

现年27岁嘅奥拿拿系巴塞隆拿青训出身，之後加盟阿积士曾3夺荷甲冠军，当时阿积士教练正正就系坦哈格，两人合作接近5年非常熟悉。坦哈格喺曼联嘅战术以组织为先，门将需要有一定脚下功夫同组织力，呢个就系奥拿拿最大卖点，月初欧联决赛对曼城有光芒四射表现，被哥迪奥拿大赞系最强脚法门将。

英国《曼彻斯特晚报》报道，就算迪基亚最终同意曼联开出嘅新合约，坦哈格仍然会引入新龙门作出竞争，除咗奥拿拿系「完美」首选目标之外，爱华顿门将比克福特同宾福特门将大衞拉耶，都喺坦哈格嘅门将目标名单当中。