近期盛传曼城右後衞基尔获加不满上阵时间减少，有意今夏离队，主帅哥迪奥拿亦开始物色新右闸，根据西班牙《马卡报》爆料，哥帅希望签入巴黎圣日耳门(PSG)翼衞阿舒拉夫，代替基尔获加。

基尔获加已经33岁，就算唔系今夏走人，估计留队时间亦唔会长，长远而言，哥迪奥拿都需要为佢搵接班人，阿舒拉夫成为热门人选。呢位24岁摩洛哥国脚踢法攻守兼备，上年世界盃决赛周协助摩洛哥爆冷打入4强，演出光芒四射。

据悉哥迪奥拿非常欣赏阿舒拉夫，认为佢年轻、速度快，十分适合「蓝月亮」战术。最关键系阿舒拉夫近期同PSG关系出现裂痕，有传佢不满球会管理混乱，而且频频换帅，特别系球季已经收咧一段日子，现时仲未请到新帅，担心影响季前备战，下届欧联又陪跑，所以希望转投其他大球会，曼城正好可以趁机抢人。阿舒拉夫现时仲有3年合约在身，估计身价达6,000万镑(约6亿港元)。