车路士中场薛耶治原本已经准备好转投沙特阿拉伯球会艾纳斯，但日前接受体测，却过唔到关，意味又要重返车仔。呢位30岁摩洛哥国脚继今年1月冬季转会窗最後时刻转投巴黎圣日耳门(PSG)「挞Q」之後，面临第2次「落车」失败。

车路士早前已经同意以1,700万镑(约1.68亿港元)将薛耶治出售畀艾纳斯，呢间沙特豪门亦向佢提供一份3年合约，辅助巨星C朗攻坚。不过，根据英国《太阳报》报道，薛耶治体测失败，唔可以签约，意味焗住重返车路士，问题系车仔无意留用佢，令薛耶治随时变成「无主孤魂」。

值得一提，车路士曾於1月冬季转会市场，准备将薛耶治外借去PSG，但最後阶段因为连续传错3份转会文件，结果PSG未能喺转会死线前为佢注册，交易被逼告吹，估唔到依家去中东搵食，都出现阻滞。幸好夏季转会市场啱啱开始，薛耶治仲有时间搵其他球会收留。