曼联新星格连活特自上年1月涉嫌殴打及强奸女友被捕之後，一直被球会「雪藏」，即使呢位21岁前锋今年2月获撤销控罪，但由於舆论压力及红魔鬼女足反对，佢至今仍未获「解冻」，新一季能否复出成疑，英国《太阳报》爆料，指罗马教练摩连奴趁机联络格连活特，邀请佢加盟。

据悉曼联领队坦哈格及部份球员支持重新起用格连活特，但亦有唔少反对声音，格连活特希望会方尽快决定佢前途，令佢可以准备新一季赛事。以目前情况睇，曼联好大机会将呢位前锋外借去其他联赛「过冷河」，消息人士指摩连奴趁机斟介，已经联络格连活特同佢嘅爸爸，倾加盟嘅可能性。

「寸王」2016至2018年执教曼联期间，一手提拔格连活特，曼联名宿毕特话摩帅一早已睇好呢位新星成才：「我当时紧曼联青年军，摩连奴见到格连活特之後，就叫佢去一队操练，由於佢只系15岁，仲要返学，唔可以去一队跟操。」2018年曼联去美国进行季前集训，摩连奴亦有带格连活特一齐乘行，至今仍然对呢位爱徒念念不忘，想向曼联借用，甚至买断佢。

罗马阵中有2位前曼联球员尼曼查马迪、基斯史摩宁，如果格连活特加盟，应该会好好照顾佢，转战意甲可能系格连活特嘅最大重生希望。