法国各大传媒纷纷报道，指巴黎圣日耳门(PSG)将会聘请安历基执教，呢位西班牙名帅入「门」首签，将会系马体会前锋祖奥菲历斯，用呢位「新C朗」填补阿根廷球王美斯离队之後嘅位置。

祖奥菲历斯因为同马体会教练施蒙尼关系恶劣，今年1月被外借去车路士，但表现一般，为呢支英超球队上阵20场仅入4球，车仔无意买断佢。呢位23岁葡萄牙国脚唔想重返马体会，会方可能继续外借，甚至出售佢。

PSG失去美斯之後，另1位射手基利安麦巴比亦可能离队，所以打算签入前锋，想把握机会签入「浪人」祖奥菲历斯。

马体会4年前以1.26亿欧元(约10.8亿港元)向宾菲加收购祖奥菲历斯，但由於佢表现一直欠佳，估计现时只值5,000万欧元(约4.3亿港元)，但马体会希望最少收番8,000万欧元(约6.8亿港元)，如果双方倾唔掂数，PSG或者会仿傚车路士，支付一笔借用费及负担祖奥菲历斯全额薪酬方式借用佢。