周四(13日)朝早美洲金盃4强大战，衞冕嘅东道主美国大热倒灶，佢哋同巴拿马激战120分钟踢成1比1平手，互射12码去到突然死亡阶段惨输4比5。巴拿马杀入决赛後，会喺周一(17日)朝早同墨西哥争夺冠军宝座。

今届以新人挂帅嘅美国，今仗面对巴拿马未见优势，两队法定时间互无纪录要踢加时。攻势较入肉嘅巴拿马喺99分钟凭艾云安达臣打破僵局，美国6分钟後就由首席射手捷西斯费拉拿追平；互射12码双方头5轮各有1人射失，去到突然死亡阶段美国嘅基斯甸路尔丹宴客，巴拿马就由卡拉史基拉射入致胜1球，自2013年後再入金盃决赛。

美国临时领队卡拉汉赛後表示：「我哋今届以几名老将带住年轻球员出战，呢班小球员好可能会系2026世盃嘅球员，我哋上咗好多宝贵课堂，依家要全力备战2026世盃。」巴拿马喺决赛对手系墨西哥，墨西哥喺4强以3比0击败牙买加，连续第3届杀入决赛。