英超劲旅曼联正式展开季前热身之旅，周四(13日)凌晨喺奥斯陆2比0轻取列斯联，今场焦点系首度披起红魔球衣嘅美臣蒙特，呢位英格兰国脚首演改踢堕後中场，45分钟表演时间助攻助守相当抢镜，领队坦哈格赛後大赞佢会成为曼联核心，更钦点佢做阵中「死球专家」，新球季必定孭重飞！

曼联首场热身赛起用唔少青年军，以华拉尼、利辛度马天尼斯、查顿辛祖同美臣蒙特带住一班小将作战，以6,000万镑(约6亿港元)转会费由车路士加盟嘅美臣蒙特，今仗由以往进攻中场角色改为较堕後嘅「8号」位，但同时有自由参与进攻，上半场就多次交出靓直线畀队友，亦有一次反抢成功後巧妙笠射，可惜仅仅笠中网顶。

下半场两队都换晒11名球员，曼联嘅青年军一样交足功课，最抢镜系法国出生嘅20岁小将艾马兰，佢喺67分钟接应队友妙传杀入禁区轻松熨入，80分钟佢转做助攻，右路交出致命斜传畀祖尔晓基龙门口扫入，曼联最终赢2比0，季前热身赛旗开得胜。

美臣蒙特今场系话题人物，领队坦哈格赛後激赞：「好劲！今场只系佢第1场波，但我哋已经可以预期佢有呢种水平，美臣蒙特嘅技术非常优秀，我好肯定佢会对球队带嚟重大贡献，亦肯定佢会享受比赛。」美臣蒙特今场包办晒所有角球、死球，坦哈格亦讲明佢会做罚球刽子手：「曼联需要能够射入罚球嘅人！」

至於美臣蒙特亦表明锺意自己嘅新角色：「我好锺意今场呢个『8号』位置，我可以返去後场拎波策动进攻，亦有自由杀上前、入禁区同帮手逼抢，我好享受呢个角色，亦觉得效果好唔错。过去1个星期训练好刻苦，好开心可以完成首个45分钟比赛。」