曼联周三(19日)进行第2场季前热身赛，喺苏格兰以1比0击败法甲劲旅里昂，入波球员系几乎被球迷遗忘嘅荷兰中场云迪碧克，赛後佢被问到有冇机会延续「红魔生涯」，呢位26岁球星就表明会持开放态度，不过消息指佢多数会离队寻求上阵机会。

曼联今场继续有新兵美臣蒙特领军，查顿辛度、安东尼马菲奥斯、华拉尼等主力都正选登场，不过上半场占尽优势下未能打开纪录。半场期间曼联几乎换走全队，新签嘅中坚庄尼伊云斯亦有份上阵，同样後备入替嘅云迪碧克49分钟接应传中，禁区内窝利抽入全场唯一入球，协助曼联小胜1比0。

入波後兴奋狂叫嘅云迪碧克，上季重伤提早收咧，今场入波令佢一吐污气，佢赛後表示：「我已经克服伤患，练咗几个星期终於可以落场，所以我倾尽全力，我唔知我嘅未来喺边，足球发生嘅事好难估计。」被问到有冇机会留喺曼联，云迪碧克表示：「有可能！但同样有可能转会，我对所有选择持开放态度，依家会专注提升状态同争取表现。」