英超劲旅利物浦今季大换血，继签入两名大牌球星苏保斯拉尔、阿历斯麦亚里士打之後，根据《天空体育》报道，仲睇中效力法甲豪门巴黎圣日耳门嘅马高华拉堤，预计呢名意大利中场，将会顶替盛传加盟沙特阿拉伯球会嘅堤亚高艾简达拿。

意大利国脚马高华拉堤今年30岁，身形矮细同唔算大只，不过拦截能力出色，而且拥有超强嘅技术、进攻意识，属於攻守兼备嘅全能中场，自2012年加盟巴黎圣日耳门後，至今已经贡献11球、61次助攻。不过华拉堤近年受伤患影响上阵时间，喺PSG过得唔算太开心，而美斯嘅离队，更再次令佢萌生去意。

不过「红军」要签华拉堤绝对唔易，佢同PSG合约去到2026年，转会费至少要7,000万英镑。除咗转会费高昂，同时仲要面对车路士、马德里体育会等多支欧洲豪门嘅竞争。