喀麦隆门将奥拿拿官宣转投曼联後，已飞抵美国向大队报到，现时随队练习，预计热身赛对皇马将会把关，主帅坦哈格表示，签入奥拿拿有三个理由，曼联签佢之後就要提高要求，目标英超争冠！

坦哈格签入奥拿拿嘅三个理由系：「首先奥拿拿嘅身体质素非常好，第二系佢对胜利嘅渴求，第三系佢嘅传控技术了得；对於一个门将嚟讲，保持不失球系第一标准，但现代足球需要门将出色嘅後场能力，奥拿拿两者兼顾，能够签到佢，我哋好开心。」

奥拿拿同利辛度马天尼斯在阿积士年代已有合作，坦哈格认为嚟到曼联亦将发挥作用：「两人关系当然甚好，对中坚嚟讲，同门将交流非常重要，门将同四名後衞，以至全队都要有联系，需要一定嘅社交同沟通技巧。」

有咗奥拿拿，坦哈格豪言曼联有能力击败世界上任何球队，但前题系球员必须提高要求，先可以争夺英超冠军：「我哋需要更加稳定，提高标准同要求，然後睇有咩结果。」