英格兰女足喺女子世盃杀入16强，将会同B组次名尼日利亚女足交锋，上场对中国女足交出2入波+3助攻嘅萝伦占士，立即成为英格兰球坛「人气王」。呢位21岁新星系车路士球星列斯占士嘅细妹，佢决赛周前就扬言要走出哥哥阴影，而佢亦讲得出做得到，连前车路士射手巴舒亚伊都喺社交网留言：萝伦占士射术好过我！

英格兰女足自首席射手美迪受伤後，进攻一直出现好大问题，分组赛首仗对海地女足只靠12码赢波，结果萝伦占士喺第2场对丹麦女足担正，立即一箭定江山为球队赢波，最後一轮对中国女足，萝伦占士大爆发入2球兼交3次助攻，如果唔系有1个入波被VAR争议性判越位，萝伦占士就会有入波、助攻「双帽子戏法」。

萝伦占士嘅光芒，亦喺男子球坛引起哄动，曾喺车路士同列斯占士做队友嘅比利时前锋巴舒亚伊，喺twitter向列斯占士表示：「哗！萝伦占士嘅射术仲好过我！」列斯占士用连串「笑到喊」emoji回应後，巴舒亚伊再话：「老实讲我只系睇咗两场，但萝伦占士真系好好好劲！」

效力车路士女足嘅萝伦占士，上季当选英超最佳青年球员，佢喺决赛周前曾表示：「我想打出自己名堂，唔系叫列斯占士妹妹，而系萝伦占士。」列斯占士上年底因伤，无缘出战卡塔尔世盃，估唔到萝伦占士抢先一步喺世盃舞台大放异彩。