曼联上星期接纳韦斯咸3,000万镑(约3亿港元)收购哈利马古尼，不过双方因为个人条件倾唔掂，令交易迟迟未能够落实，「红魔鬼」周二(15日)凌晨进行新季第1战前，领队坦哈格就再向呢位前队长呼吁：「如果冇信心争赢正选就走啦！」

虽然转会费已经倾掂，但韦斯咸只能向哈利马古尼开出12万镑(约120万港元)周薪，远不及佢喺曼联嘅19万镑(约190万港元)周薪，有指曼联会畀多600万镑(约6,000万港元)赔偿金，弥补佢最後2年合约嘅减薪损失，但至少交易仍然拖住。

对於哈利马古尼嘅情况，坦哈格亦打晒开口牌：「哈利马古尼要为自己位置而战斗，佢有能力成为顶级中坚，佢系英格兰最佳中坚，点解唔可以系曼联最佳？不过哈利马古尼要用表现证明出嚟，如果佢冇信心争赢就走啦，佢要作出最後决定。」