基利安麦巴比同巴黎圣日耳门(PSG)嘅「世纪暗战」戏剧性大和解，PSG会长艾卡理化表示，呢位24岁法国国脚获准归队操练，将出战下场法甲对图卢兹。据悉双方经过磋商之後，达成协议，麦巴比答应唔会自由身转会，意味可能续约，所以获得解冻。

基利安麦巴比拒绝续约，被指将於明夏以自由身转投皇马，因而遭球会踢出早前亚洲之旅季前集训，上仗法甲对罗连安特，亦冇入选大军名单，传出可能全季被雪藏。不过，双方都明白如果继续僵持落去，只会两败俱伤，根据法国《队报》爆料，PSG已经同麦巴比达成协议，後者承诺唔会自由身离队，以免令球会人财两失，会长艾卡理化随後亦透露，麦巴比会归队，今季继续为PSG披甲。

由於基利安麦巴比只剩下唔够1年合约，佢承诺唔会自由身离队，意味可能同意续约，或者签订某种「补偿金协议」，令第三方球会需要支付一定金额，先至可以签入呢位射手。

盛传皇马一直等紧明夏免转会费签入基利安麦巴比，但如果到时需要畀钱，可能令呢单世纪转会存在变数。