夏天继续疯狂组军嘅车路士，继续受到伤患摧残，继韦斯利科芬拿同尼干古未开咧已长抖之後，新任队长列斯占士日前操练亦告受伤，而且仲系困扰多年嘅大腿筋问题，消息指列斯占士将面临「数个月」嘅休息期。今次系列斯占士近2年第5次大腿筋受伤，惨成玻璃人。

车路士喺英超首战1比1和利物浦，接指艾斯派古达做队长嘅列斯占士，踢到76分钟就被换走，领队普捷天奴当时话佢冇事，只系重伤初愈唔想博得太尽，估唔到近日操练再次受伤，随军记者Nathan Gissing爆料指佢大腿筋受伤，将会进行详细检查，面临数个月嘅缺阵时间。

23岁嘅列斯占士出道後一直反覆受伤，至2021年开始已出现过11次大小伤患，其中涉及大腿筋嘅伤患就有5次，上年底就因为膝伤而错过卡塔尔世盃决赛周，上2季英超只系踢过26场同16场，不断出现嘅伤患问题大大影响列斯占士嘅足球发展。

列斯占士缺阵期间，预计车路士将起用法国小将文路古士图，车路士今年初用3,000万镑(约3亿港元)向里昂签入呢位20岁新星，佢上场联赛入替列斯占士，表现获得好评。