亚冠盃外围赛附加赛首回合，沙特劲旅艾纳斯主场迎战阿联酋球队沙比阿尔阿里，今场系葡萄牙球星C朗拿度首次喺亚冠盃登场吸引全球目光。不过沙比阿尔阿里亦非善男信女，上季打入亚冠盃16强，对住未磨合嘅艾纳斯有一战之力，让球客胜受让2球抵玩。（周三凌晨1时20分开赛）

艾纳斯季前重金打造星级阵容，今个月率先勇夺阿拉伯球会冠军盃冠军，自然被视为亚冠盃夺标热门。佢哋展开亚冠盃之旅前，据报已经倾掂签入曼城中坚拿朴迪同波图中场奥达维奥艾美臣，转会费总值9,000万欧元（约7.66亿港元），横扫联赛、亚冠盃冠军嘅决心相当明显。

虽然以C朗、沙迪奥文尼、波索域、阿历士迪尼斯、施高科芬拿等金钻阵容，牌面相当闪亮，不过太多新球员之下肯定需要时间磨合，艾纳斯开季两场联赛输晒，证明球队仲有好多要改善地方。

沙比阿尔阿里上届亚冠盃杀入16强，结果被沙特球会希拉尔淘汰，佢哋今季卷土重来，亦从水晶宫罗致中场米利禾积域等球星，上一圈就3比0轻取艾华达，演出唔曳。沙比阿尔阿里近5仗亚冠盃作客只输过1场，有力顶住艾纳斯嘅进攻，受让2球当然要捧让球客胜。