英格兰职业足球运动员协会(PFA)举行2022/23年球季颁奖礼，曼城前锋艾宁夏兰特获得最高殊荣嘅「英格兰球员先生」，成为自2001/02年球季曼联射手云尼斯达莱之後，近21年以来首位第一季踢英超就获得此殊荣嘅外援球员。与此同时，PFA最佳11人阵容之中，曼城占5席成为大赢家，反观「双红」曼联同利物浦1人都冇。

艾宁夏兰特上年夏天由多蒙特转投曼城，迅速融入球队，呢位23岁挪威国脚上季为「蓝月亮」各项赛事上阵53场入52球及9次助攻，成为球队夺得英超、英足盃及欧联冠军嘅大功臣，佢之前已经当选上季英格兰足球先生及英超最佳球员，今次再下一城获得由球员选出嘅「英格兰球员先生」。

艾宁夏兰特获奖之後话：「好荣幸得到呢个奖，能够获得竞争对手们嘅认同，感觉实在太美妙，好多谢各位投票畀我嘅人。」夏兰特上季以36球打破舒利亚及高尔保持嘅纪录，成为英超史上单季最多入波嘅神射手，对於有冇谂过要超越舒利亚(260球)，成为英超历史射手王，佢话冇谂得咁远，只想享受现在。

另外，上季英超亚军阿仙奴翼锋布卡约沙卡获得PFA最佳年轻球员，阿士东维拉女足瑞秋戴莉当选「英格兰球员小姐」，车路士女足萝伦占士获得最佳女子年轻球员。

至於PFA最佳11人阵容，曼城占5席，包括艾宁夏兰特、奇云迪布尼、洛迪卡斯简迪、史东斯、鲁宾戴亚斯。至於阿仙奴有布卡约沙卡、马田奥迪加特、威廉沙列巴、门将兰斯达尔，其余2人分别为纽卡素右闸捷比亚，以及已经由热刺转投拜仁慕尼黑嘅哈利卡尼。