法甲劲旅摩纳哥周四(31日)宣布，球会成功向阿仙奴签入22岁前锋巴洛根，据报转会费为3,800万镑(约3.8亿港元)，虽然呢个价钱喺今时今日嘅转会市场已非常「普通」，但原来已经系阿仙奴历来最贵卖人纪录！

巴洛根系阿仙奴青训出身，上季被外借去兰斯大放异彩，喺法甲攻入21球排射手榜第4位，夏天入籍代表美国国家队上阵，摩纳哥今次以3,800万镑转会费收购之外，阿仙奴喺佢下一次转会中，仲可以分多17.5%嘅「转手费」，巴洛根同摩纳哥签约5年。

巴洛根喺阿仙奴只系踢过2场英超，不过今次转会亦创下球会纪录，打破阿历士张伯伦喺2017年加盟利物浦嘅3,500万镑(约3.5亿港元)，成为「兵工厂」史上卖出最贵球员。