阿仙奴近期频频出手，同一班主力倾续约，继日前同队长马田奥迪加特达成协议，将续约至2027年之後，亦准备同後衞宾韦特展开谈判。呢位25岁英格兰国脚虽然仲有3年合约在身，但会方仍然希望提早同佢续长约，可见呢位守将喺领队阿迪达心目中有重要地位。

宾韦特2021年夏天以5,000万镑(约4.9亿港元)转会费由白礼顿加盟阿仙奴，奠定主力地位，佢技术非常全面，可以胜任中坚同右後衞，因而深得阿迪达器重。根据英国《每日邮报》爆料，阿仙奴方面已经急不及待，准备同衞宾韦特展开续约谈判，预料会大幅加薪，作为对佢嘅奖励，宾韦特现时周薪为12万镑(约117万港元)。

阿仙奴另1位後衞富安健洋喺日前国际热身赛日本对德国，有出色表现，佢话因为兵工厂要求非常高，令自己水准不断进步，并且仲有提升空间。呢位日本国脚始终未能稳占正选位置，但佢认为只要保持水准，做好每一件事，有信心可以喺阿仙奴立足。