周二(19日)凌晨英超独脚戏，般尼作客被诺定咸森林逼和1比1，拎到重返英超後第1分，但仍然排喺联赛榜尾二。连埋包尾嘅卢顿同尾4嘅锡菲联，今季英超3支升班球队仍然未赢过波，般尼领队高柏尼就指球队开始上力，有信心可以尽早开斋。

般尼今场表现唔差，作客情况下控球甚至稍占上风，41分钟岩度尼射入领先1比0；森林喺劣势之下，61分钟凭赫臣奥杜尔禁区顶轰入世界波追平。般尼尾段有利尼科士打入波被判诈胡，呢位前锋补时阶段仲开肘打人被罚红牌，最终两队1比1握手言和。

虽然升班後仍未赢过波，不过领队高柏尼就满意球队表现：「喺英超拎每1分都好困难，但经过4场後，我见到球队有能力竞争，今场视乎你企喺边面，我觉得般尼值得赢波，如果球队继续进步，成绩一定有好大改善，我见到般尼有好大进步空间，呢个系最令人兴奋嘅地方。」