英超劲旅阿仙奴相隔6年半後再战欧联，周四(21日)凌晨B组首战，主场4比0大炒荷甲冠军燕豪芬，一众主力喺下半场亦提早「收工」，留力应付周日(24日)英超对热刺嘅「北伦敦打吡」大战。

阿仙奴对上一次踢欧联已经系2017年3月，今仗阵中唔少球员都系首次踢欧联，就连领队阿迪达都系「初体验」，不过初生之犊不畏虎，布卡约沙卡8分钟先开纪录，李安度杜沙特20分钟再下一城，加比尔捷西斯38分钟射成3比0，下半场收住油咁踢下，马田奥迪加特仍然入多一球凑成4比0大胜。

阿仙奴今场赢得轻松，辛真高、布卡约沙卡、加比尔捷西斯、迪格兰赖斯等主力都提早被换，留力对热刺嘅大战，领队阿迪达赛後表示：「好开心有机会畀球员休息，同时亦可以畀其他较少上阵球员落场。赢波就系最好嘅准备(对热刺)，球员依家充满能量，如果我叫佢哋听日即刻练波，佢哋都会好乐意接受。」