利物浦上轮英超1比2不敌热刺，VAR摆乌龙累「红军」入波被判越位，引发球坛极大回响，但原来呢场波嘅冤案唔止一单，据《ESPN》报道，英超独立调查小组判定，迪亚高祖达喺比赛中2黄被逐系「错判」，不过小组并冇权推翻判决，意味迪亚高祖达波监照坐。

英超嘅比赛关键事件调查小组有5名成员，包括3名前球员/领队、1名英超代表同1名英国职业裁判员公司代表，佢哋审视迪亚高祖达嘅红牌事件，最终以3比2投票判定迪亚高祖达「唔应该拎第2张黄牌」。可惜呢个小组嘅结论唔代表红牌被推翻，迪亚高祖达仍然要喺周日(8日)作客白礼顿一仗停赛。

迪亚高祖达2张黄牌都系被指侵犯热刺後防乌杜治，不过第1面黄牌乌杜治疑似插水，跌低後仲不断叫球证畀牌迪亚高祖达，赛後大批利物浦球迷喺网上攻击乌杜治，当中涉及种族歧视，热刺亦发声明指摘利物浦球迷嘅行为。