英格兰周四(5日)公布新一期国家队名单，26人大军依然系熟口熟面，哈利马古尼、加云菲腊斯2位「铁胆」仍然在列，阿仙奴翼锋布卡约沙卡亦带伤入选，不过最令球迷不满嘅系，季初状态大勇嘅禾特普斯继续被忽视，呢位韦斯咸中场亦忍唔住寸爆修夫基！

修夫基经常被批评偏爱个别球员，喺曼联长居後备嘅哈利马古尼入选已成定律，球迷都被逼接受，但今次中场点兵就有好大争议，今季英超只上阵70分钟嘅加云菲腊斯继续入选，已转战沙特嘅佐敦轩达臣亦顺利上榜，反而开季8场有2入波同6助攻嘅禾特普斯名落孙山。

禾特普斯周五(6日)欧霸盃再交助攻，赛後亦忍唔住寸爆修夫基：「我的确好失望(落选英格兰)，但球员可以控制到嘅，就系踢出国家队嘅水平，上阵时间亦非常重要，我依家两样(表现、上阵时间)都有，我觉得自己可以入选，可惜事与愿违。」英格兰今个月先喺热身赛对澳洲，之後再喺欧国外主场大战意大利。