葡萄牙喺今届欧国盃外围赛10战全胜出线，表现所向披靡，中场般奴费南迪斯为球队创造14球，包括射入6球及8次助攻，呢位曼联中场不知不觉已经取代巨星C朗嘅国家队核心地位。

葡萄牙队长C朗今届欧国外入10球及2次助攻，数据上仍然出众，但讲到关键性作用，般奴费南迪斯更胜一筹，包括2次对同组最强嘅斯洛伐克，都成为主角，其中9月作客斯洛伐克，佢射入全场唯一入波，协助葡萄牙赢1比0，上月两队再碰头，般费贡献2次助攻，为葡萄牙赢3比2，否则无法10战10胜。

般奴费南迪斯对於自己喺欧国外取得6个入球及8次助攻嘅亮丽数据，佢处之泰然：「每个人都想入波，都想发挥重要作用，我唔想评论个人表现，最重要系球队整体踢得好。」般费表现甚有大将之风，相信将来C朗退出国家队之後，佢应该可以接任做新队长。