前英格兰国家队主帅云拿保斯嘅家人周日（26日）发出声明，这位名帅因长期伤患於周六（25日）离世，享年80岁，一众爱徒如连尼加等纷纷向佢致敬。

云拿保斯曾执教水晶宫、昆士柏流浪、热刺、米杜士堡、列斯联等英格兰着名球会，1984至1987年转战西甲接手巴塞隆拿，并带领呢支劲旅重夺联赛冠军，系当时少有在海外获得成功嘅英籍教头。

英格兰未能杀入1994年世盃决赛周，云拿保斯毅然接手，更对一度喺意甲迷失嘅天才中场加斯居尼予以充分信任，并在1996年带领东道主「三狮兵团」闯入欧国盃4强，只系互射12码不敌德国饮恨，当时射失12码系现任英格兰主帅修夫基，亦系云帅执教生涯最高峰，10年後佢以助教身份，重返「三狮兵团」辅助主帅麦卡伦，但未能进身2年後欧国盃决赛周。

对於恩师离世，修夫基大赞云拿保斯战术出色兼具前瞻性，同属1996年欧国盃「三狮」成员加利尼维利，感激云拿保斯当年大胆提拔佢上国家队，一代射手舒利亚对云帅离世极度伤心，更指自己欠佢太多，曾在巴塞隆拿同热刺同云帅合作过嘅连尼加，表示佢系最具创新精神嘅教练。