白礼顿天才前锋艾云费格逊近2季迅速冒起，合共上阵44场入16球，被誉为「新哈利卡尼」，获得唔少大球会垂青，呢位19岁新星近日接受传媒访问时，承认自细系曼联球迷，睇来如果红魔鬼想签入呢位爱尔兰国脚，应该可占先机。

艾云费格逊话：「我从小就支持曼联，曼联以前有朗尼、贝碧托夫、韦碧克等前锋，佢哋都系出色射手。」至於讲到有多间大球会睇中佢，艾云费格逊处之泰然：「我14岁嘅时候，已经有关於我嘅转会传闻，当时喺社交网上睇到好多人讨论，我第一次成为受关注人物同话题，返学嘅时候，会觉得其人眼光怪怪哋，依家已经习惯晒。」

曼联队内前锋今季脚头无灵，会方唔排除再签入射手，艾云费格逊都系目标人物之一，虽然佢已同白礼顿续约至2029年，但球会行政总裁保罗巴伯早前表示，续约只属於保障双方，将来唔排除出售艾云费格逊，估计佢身价达1亿镑(约9.9亿港元)。

事实上，白礼顿近年高价出售多位主力，相信艾云费格逊好大机会登入豪门。