周日(17日)英超大战，阿仙奴主场2比0击败白礼顿，力压利物浦重登榜首。夏天加盟嘅德国中场夏维斯近期挞着，赛前获颁阿仙奴11月最佳球员奖後，今仗再有入波成为赢波功臣，领队阿迪达赛後亦大赞呢位德国国脚系「顶级球星」。

面对近况勇猛嘅白礼顿，阿仙奴今仗主动压逼控制形势，但连番攻门都未能转化入球。直到53分钟，阿仙奴角球攻势由加比尔捷西斯顶入，白礼顿之後力图反攻，但喺87分钟被夏维斯单刀冷静射入，阿仙奴全场25次攻门下最终赢2比0。

夏维斯赛前喺德国名宿梅迪萨卡手上拎阿仙奴每月最佳球员奖(11月)，今仗延续强势，攻入个人近7场比赛第4球，阿迪达赛後表示：「又系夏维斯？佢系顶级球员，当佢信心同安全感增加，你就睇到佢嘅表现，佢充满智慧，踢得好有侵略性同埋效率，顶级！」

白礼顿今场只得1次中目标埋门，领队迪萨比亦输得心服口服：「我对战果失望，但战果合理，阿仙奴踢得好过我哋好多，佢哋系今季目前英超最佳球员。我哋好少会踢得咁被动，通常都会有更多控球权同入波机会，但我哋唔系太多机会遇到呢种质素嘅对手。」