迪基亚上年夏天约满离开效力咗12年嘅曼联之後，一直「失业」未有球会收留，根据《The Athletic》爆料，呢位33岁西班牙钢门近期醉心钻研墨西哥「板式网球」(Padel)，可能打算结束15年职业足球员生涯，转行进军呢项新兴运动。

迪基亚「脱魔」大半年以来，曾经传出多支球队有意签佢，包括皇马、贝迪斯、韦斯咸、纽卡素等，甚至一度爆出曼联想请佢回巢，代替表现欠佳嘅奥拿拿。不过，一直只闻楼梯响，未有下文，据悉冬季转会市场重开後，仍然未有球会正式提出斟介呢位上季英超「金手套」得主，令人怀疑佢今季未必有班落。

英国《每日邮报》曾经报道，迪基亚只希望为有力争重要锦标嘅球会效力及担任正选，如果搵唔到合适球会，宁愿考虑提早收山。《The Athletic》最新消息指迪基亚现时专注练习打「板式网球」，似乎开始为挂靴之後，搵新出路，同时可以保持体能状态。

「板式网球」1969年始创於墨西哥，呢项冷门运动集合网球、壁球、乒乓球、羽毛球等技术特点於一身，由於对运动员嘅力量及技巧要求相对比较低，的确适合迪基亚呢种「半退休」人士玩。

事实上，球坛上亦不乏「板式网球」爱好者，曾经效力马赛、纽卡素、巴黎圣日耳门等大球会嘅前法国国脚宾艾化2022年离开里尔之後，因为冇球会收留，於是转战「板式网球」，并已经取得排名，根据上年11月成绩，宾艾化喺法国42,000位「板式网球」选手之中，排第1,342位，话唔定将来，呢2位前英超球星有机会喺「板式网球」场上交锋。