英格兰名将朗尼上年10月回归英伦，执教英冠球队伯明翰，不过经历「灾难性」82日後，周二(2日)惨被炒鱿。连同谢拉特、林柏特、加利尼维利、史高斯、苏甘保等等，曾号称「黄金一代」嘅英格兰名将教波冇个掂，令人失望。

朗尼上任嗰阵伯明翰排英冠第6位，但元旦日(1日)吞列斯联3蛋後，朗尼领军15场只得2胜4和9负，跌到落尾5面临降班危机，伯明翰亦宣布同佢提前解约。朗尼被炒後发声明亦充满怨言：「好多谢伯明翰畀机会我，足球系成绩行先，球队表现亦未达我要求嘅水平，但一个领队最需要嘅系时间，我唔相信13个星期时间系足够制造我想要嘅改变，我会消化呢次打击，用时间陪下屋企人，准备下一个机会。」

朗尼嘅失败，再次印证英格兰球员「踢而优则教」行唔通，谢拉特经过「维拉噩梦」後，依家喺沙特教伊蒂法克亦教到一镬粥；林柏特之前教车路士、爱华顿亦系劣评如潮；加利仔、史高斯、苏甘保等短暂执教亦冇个成功，英格兰传奇前锋连尼加表示：「睇番近20年英格兰最好球员，朗尼、谢拉特同林柏特系最好3个，我欣赏佢哋尝试做领队，但亦证明一个天才同努力嘅球员，唔代表会成为顶级领队。我希望朗尼唔好放弃，要再接再厉。」