周日(7日)凌晨英足盃第3圈赛事，近况回勇嘅车路士主场4比0大破普雷斯顿，今季第2次踢出3连胜走势进身第4圈。英格兰前锋史达宁今仗射入精彩罚球，佢最近嘅2个球都系罚球直接入波，成功解锁新技能，成为车路士嘅罚球专家。

车路士迎战英冠嘅普雷斯顿并唔轻松，超过半场都咬唔入对手，去到58分钟先由布查头槌顶入。车仔打开纪录後即刻顺晒，堤亚高施华66分钟接应角球顶入，3分钟後史达宁禁区外主射罚球直飞死角。85分钟史达宁再助攻安素费南迪斯入波，完成4比0大捷。

史达宁轰入今季各项赛事第7球，同时打破自己1个半月入球荒，佢对上一次入波系上年11月底，作客纽卡素同样系禁区外轰入精彩罚球。Opta数据显示，史达宁英超生涯头168球，只得1球系罚球射入，但最近2球都系用罚球直入，即时升呢做「罚球王」。

车路士领队普捷天奴对史达宁解锁新技能表示高兴，赛後讲笑话：「我同史达宁讲，碧咸依家好惊，因为你就嚟威胁到佢入罚球嘅纪录！罚球嘅嘢你可以日练夜练，但最重要系喺球场上射入，史达宁冇得别训练，纯粹系自信同技术嘅表现。」