车路士今季伤兵满营，法国前锋尼干古上月重伤初愈，踢咗3场比赛後又再受伤，领队普捷天奴透露佢可能「缺阵数场」，消息指呢位法国前锋将缺阵3个星期。由於尼高拉斯积逊要踢非国盃，令原本被挂牌嘅布查成为依家唯一箭头，车路士或焗住留用佢到季尾。

尼干古缺席上场英足盃後，普捷天奴证实佢臀部受伤，未来几场未必可以候命，庆幸嘅系阿尔巴尼亚前锋布查喺对普雷斯顿打破入球荒，车仔未来一段日子都要靠佢顶住。普捷天奴表示：「布查系时候交货，佢需要更多笑容，乐观态度对佢会有好处。布查嘅潜力极大，讲紧系英超以至欧洲最有潜力嘅年轻前锋，上场入波对佢嘅信心会有好大作用。」

据报车路士本来打算1月卖人套现，布查、干拿加历查、杜利奥查洛巴等青训球员都系清洗目标，不过随住尼干古同尼高拉斯积逊齐齐缺阵，现年22岁嘅布查有望继续留队，或可以用表现去令普捷天奴回心转意。