米杜士堡喺英联盃4强首回合以1比0击败车路士，有望相隔20年再尝呢项锦标嘅冠军滋味，呢支英冠球队曾於上世纪90年代中期有过风光日子，包括签入2位球星祖连奴、拉云拿利轰动一时，并於97及98年连续2届打入英联盃决赛，现时由曼联名宿卡域克执教，有望重现昔日光辉岁月。

米杜士堡1994年聘请曼联传奇名将白赖仁笠臣担任领队，并大肆增兵，最受注目系1995年以当时天价475万镑收购巴西球星祖连奴，呢位绰号「小巨人」嘅中场脚法细腻，为当时英超带来唔少娱乐性。

1996年米堡签入祖云达斯射手拉云拿利，呢位意大利「白头佬」首季英超上阵33场有16球进帐，可惜球队该季降班。此外，英格兰「坏孩子」加斯居尼1998年加盟米杜士堡，亦引起关注，但呢位中场当年已处於低潮。

另外，英格兰现任主帅修夫基球员时代曾於2001至06效力米杜士堡，并以队长身份协助球队夺得2004年英联盃冠军，相隔20年之後，米杜士堡能否再次夺冠，大家拭目以待。