今季成绩突出嘅韦斯咸，新年出现伤兵潮，啱啱伤愈嘅主锋米查利安东尼奥，日前训练再次受伤，据报将缺席4至6个星期。今次噩耗将令韦斯咸要紧急签人，传闻目标系今季喺法甲表现出色嘅蒙彼利埃射手艾科阿当斯。

米查利安东尼奥自上年11月中後一直养伤，原本预计上场英足盃对布里斯托城复出，但赛前练习不慎跌倒触伤旧患，英国《每日邮报》指呢位牙买加国脚又要再抖4至6个星期，加上查洛保云同卢卡斯柏基达上仗受伤，令韦斯咸人手短缺，丹尼艾格斯外借狼队嘅转会亦可能叫停。

韦斯咸本来已经想喺冬季签前锋，米查利安东尼奥再伤更令签人变得急切，据法国传媒报道，效力蒙彼利埃嘅尼日利亚前锋艾科阿当斯系主要目标，佢今季法甲17场入7球，排喺射手榜第3位，预计转会费会系2,000万镑(约2亿港元)。