巴塞隆拿前锋祖奥菲历斯近期状态走下坡，而且愈踢愈躁，上仗西班牙盃对巴尔巴斯特罗，不满被换走，发脾气自己离场，引起巴塞球迷猛烈评击，有传教练组成员开始质疑呢位24岁葡萄牙国脚嘅能力，可能今季结束後，将佢退回畀马体会。

祖奥菲历斯上年夏天转会市场关闭前，被马体会外借去巴塞，季初有唔错表现，但之後无以为继，近期更失去正选。上仗西班牙盃菲历斯虽然获得担正，但踢到72分钟被换走，独自行入更衣室，遭巴塞球迷批评唔专业，亦唔尊重球队。

据悉祖奥菲历斯除咗不满上阵时间减少之外，亦对教练沙维将主射12码权力交畀根度简，有所微言。西班牙《每日体育报》爆料，教练组成员质疑祖奥菲历斯是否有能力喺队内立足，特别不满佢状态起伏不定。

不过，巴塞管理层念在菲历斯借用费及人工够平，希望再观察佢表现，暂时未打算即时放弃佢，但如果继续冇起色，今季结束之後，就唔会买断呢位前锋。